Inspired by細路哥II

一班就嚟畢業o既大學生落旺角唱K慶祝順利畢業。
當其中一個朋友唱到流下感觸之淚o既時候，其中一位突然諗起一個問題：
「大學畢業之後大家會變成點呢？」

四年後，沒有變成一個西裝骨骨o既中環人，銀包只有一兩張信用卡，但就已經買咗一部好想擁有o既二手汽車，好好彩唔駛點供。

四年喇，已經轉過好多份工，識做o既嘢好似好多，同時亦發覺學識就越嚟越少。响呢個時間，好想得閒去下gym，阻止肚腩繼續「發肉」，但係始終都係得個諗字。

好唔容易放低一段好深刻o既感情，女朋友仍然一個都冇，而且發現越嚟越難去愛。

有工返o既時候總會好少時間陪屋企人，放假o既時候又走咗去同朋友玩，成日都有一種對家人講唔出口o既內疚同遺憾。

同年終於有同齡朋友結婚喇，睇住人哋竟然儲到首期買到一層二手樓，有泳他但冇會所，仍然一臉幸福。

努力吃喝玩樂，娛樂越嚟越多，快樂就越嚟越少。一個人坐喺屋企，拎住個搖控不停轉台，睇到一齣橋段老土o既煽情電影，竟然流出一滴自上次失戀後o既眼淚。

突然之間又諗起，喺嗰一晚，一大班同學走出去旺角唱K唱通頂......

仲記得嗰朝早扶住一個飲醉咗o既同學返宿舍o既時候，
吐露港o既朝陽射進房間，
刺眼得令人流下眼淚......