灣仔，車友勿近！

世貿開會，搞到成個灣仔好似死城咁。

本來都冇打算要係呢個咁敏感時候過去灣仔呢個麻煩之地，但遇著有個朋友係APA睇完戲而我又要拎一盞新買o既燈俾佢，咁咪騎銀鯊過去，順道同朋友食d野囉。

諗住夜晚冇會開，而且又唔係去灣仔北就實冇事啦。

點知一去到盧押道（即係修頓球場對面）o既電單車位，小喇叭！封晒唔俾泊，再番兜入去謝斐道，一如所料，封埋！！仲要唔止封一日半日，由十號封到二十號，問你死未！

見到有車唔理封位照泊，我都係免麻煩，周街都係差佬，真係搏唔見三百二咩！終於將盞燈交o左俾朋友之後，野都冇食就原車折返港島東。

各位有車o既朋友，世貿期間切忌走入灣仔鬼城，唔係真係麻鬼煩。