大埔之歌

以上MV由大埔居民威振推介
勁正!!
呢個MV拍攝年份係1981年
當年香港政府應該係想向市民推介新市鎮
等o的城市人搬入去住
所以就搵歌手唱好大埔
道理同今日慶回歸o既《香港始終有你》一樣
不如就睇下當時政府覺得o既賣點係乜

彭建新《大埔之歌》

歷史好早
祖先已建立大埔
採珠最發達
唐代有紀錄
唔係養生蠔
晨早就知道

賣歷史
正所謂慎終追遠
唐代已經有人o係大埔採珠喎
仲唔係一個好地方!?
不過
採珠還採珠
關養生蠔咩事呢?
難道當年大埔o既competitor係
流浮山!?

仲有交通好
火車會到達大埔
點樣遠路
由大埔道
行路你都到

賣交通好
有火車到大埔
幾方便呀
仲有條大埔道喎
簡直就係四通八達啦!!
(當時未起吐露港公路)
不過大埔道還大埔道
「行路你都到」到底係一個咩賣點呢?
冇火車?
行路啦!
總會行到返屋企o既!!
咁?

市鎮日日有新面貌
公共住屋幾十座都建好
搵番間最好

賣樓
有公屋
大把地方有得住
正!!

市鎮樣樣有得賣
商業地區好旺盛開市早
全靠大眾勤勞

賣繁榮
乜都有得賣
自給自足
仲要開得早
問你怕未

大埔鄉親好
始終最愛護大埔
祖孫世代
人瑞細路
長壽永不老

賣人情味
鄉親父老都愛大埔喎
你話呢度幾正!?
之但係
個個都長壽不老......
彊屍咩!?

市鎮日日有新面貌
工業村一座座不貴租
再多啲更好

賣商機
當年香港仲好依賴工業
有工業就有商機
工業村咁抵租
大埔一定會繁榮
多o的人o係度開工廠
就業機會就會多
到時就唔怕冇嘢做啦!!

市鎮樣樣向好邁步
一路路高速咁發展
朝偉大o既藍圖

賣遠景
又高速發展又偉大藍圖咁
前途簡直係無可限量!!

大埔風光好
出名最秀麗瀑布
景色更美麗
人人若努力
能預見得到

賣靚景
風景靚
仲正到有新娘潭瀑布
不過個shot所見o既瀑布
好似有o的削......

唔知仲會唔會搵得到其他o既歌
例如粉嶺之歌、元朗之歌咁呢?
呵呵呵呵~~