無啦啦瞓禮頸

上星期真係多災多難......
話說星期二無啦啦爆晒缸後
星期四就來個無啦啦超級無敵瞓「禮」頸!!!

星期四起身都仲係好地地
甚至食埋個lunch都唔見有咩事
突然下晝三點幾(都唔係好記得.....)
條頸一擰向右邊就痛
唔止痛
仲會突然抽筋
一抽就痛到出唔到聲o個隻!!!
仲由本來間唔中抽一次
變成好快又抽
不停咁抽
終於到六點忍唔住
早走去睇醫生

心諗睇西醫應該冇乜用
就不如去試下搵蔡醫師針針佢
之前睇過兩次蔡醫生
兩次都有針
但只屬於冇病冇痛
針下飲下茶當調理身體
今次諗住搏一搏
希望佢針完可以唔會再抽筋

醫師見到我即刻話：「乜咁大鑊呀，(個人)變晒型喎」
入到房瞓低
o係手腳落完針之後
蔡醫師一邊用手轉我右腳某支針
一邊問：「痺唔痺呀?」
嘩!!!!大佬!!!痺到飛起呀!!!
轉完一輪
蔡醫師又問：「有冇鬆o的呀?」
我試試擰下個頭
答：「冇乜喎，不過痺到隻腳都就嚟抽筋」
蔡醫師聽完之後
喺我兩腳中間點著啲草藥
就行咗出去

如是者
蔡醫師喺我右手右腳度轉咗幾次之後
佢就拔走腳同頸o既針
剩番兩支分別喺左右手o既針
叫我坐起身
而佢就好似tune電台咁
左右兩支針一齊轉
嘩!!!再次痺到飛起!!
今次佢一邊轉
一邊叫我擰個頭!!
就係呢刻
神奇o既事發生喇
我條頸就一擰就抽
變成越來越擰得多
如是者蔡醫生轉下放下
轉下又放下支針
一方面手開始冇咁痺
而條頸就越來越鬆
蔡醫師見差唔多
就拔走埋最後兩針
叫我落床出去拎藥

經過頭先o既「十大酷刑」之後
我標晒冷汗
直情有種想嘔o既感覺
返到屋企食埋飯飲埋藥
沖個涼就上床瞓

第二朝起身
條頸真係鬆咗好多
雖然都唔係好擰得到去右邊
返工嗰陣仲要就住就住
但到咗下晝
條頸就好似冇晒事咁
點擰都唔痛
頂多係向後時有少少痛

呢次之前
我對針炙只係抱住「不妨一試」o既心態
但呢次明顯係好有效
大吉利是下次有咩事
都可以去針一針!!!