入教

今年一月尾

突然無法開啟家中電腦

細佬說是底板死了

與其花錢維修

不如買過部新機

一直想試試用mac

思前想後

便趁著這機會

購入最新款的MacBook

正式入教

透過電話在Apple Store訂購MacBook

只需一天

簇新的MacBook便自動送上門

Apple Store的服務確令人稱心滿意

花了一些時間熟習新機

尤其喜歡iPhoto的一條龍執相功能

由import到執相到upload上facebook/flickr仲要加埋tag

真係方便到喊

但仍然有花時間執手尾的部份

包括當我從舊hard disk import mp3時

部份歌曲的資料變成亂碼

累我要逐首聽一遍再修正歌曲資料

花去不少時間!!!!

相信還有不少花費精神力氣的手尾要跟

繼續努力!!!!

虎年自炒﹣ER遇故知

虎年自炒﹣ER遇故知

繼續講埋炒車之後嘅發展

去到律敦治急症室

爸媽與女友比我更早到達

因我雙腳受傷

只得繼續躺在床上被人推入ER

甫入ER

便見到遠處坐著細蘇

是叱咤903好回家的細蘇

經護士評估後

我被評為「半緊急」

候診時間約為90分鐘

就這樣

我又回到急症室大堂

躺著等候

我見傷勢並無大礙

便著爸媽先行回家

留下女友陪著我

個多小時後

終於聽到自己的名字

我被推到診症室

戴著口罩的醫生一走進來

我覺得他很眼熟

他問我問題

我並不回答

反而我問 ：「你係阿Sam?」

他不理睬我

我追問：「你係咪讀中大架?」

他定一定神

凝神看著我

接著說：「你係阿Pete?」

原來他是我在大學Year 1時的宿舍同房

那一年我剛入U

沒找到相熟的朋友跟我同房

我便被分配同與兩名醫科新生同房

一年後我們沒有繼續同房

也失去聯絡了

想不同會在十年後

我受了傷的這一天

以醫生與病人的身分相遇

可真是天意弄人

哈哈哈哈

相認後

Sam替我仔細檢查

幸好大都只是皮外傷

便安排護士替我洗傷口

洗傷口是一個相當痛苦的程序

為免傷口的髒物引致發炎

護士必需狠狠地用消毒藥水將傷口的髒物刮掉

實在好鬼死痛

護士取來幾支麻醉Gel

當Gel接觸到傷口

真係「那」到飛起

然而

只要你忍耐到這「那到飛起」的階段

傷口便會感到十分涼快

到護士真的替我洗傷口之時

便變得不太痛楚了

萬分感激麻醉Gel的神奇功效!!!

洗完傷口

就要去照X-ray

左手左腳傷勢比較嚴重

為遷就部X光機

躺在床上要擺出一些高難度姿勢

諗番都幾好笑

阿Sam睇過 X 光片

確定沒有骨折

便讓我出院

隨後幾日都要到政府診所洗傷口

每次都要重覆那相當痛苦的程序

可真是自作自受

但當日選擇了電單車

只可以講一句

「出嚟行，預咗要還!!!!!」

坦白說

要我放棄電單車確實未係時候

頂多再小心一點啦

仲有

真係好多謝屋企人同女友的悉心照料

同埋各方好友的關心

經過兩個星期

傷口已經好得七七八八

好快就會完全康復！

Yeah!!!!!!!

虎年自炒

出事後一個星期

係時候講下事發經過

話說上星期喺西環食完飯

騎住Fighter沿告士打道向紅隧方向行緊

眼見有部的士由分域街左轉告士打道

心諗唔dup車就會撞埋去

點知一dup

心知不妙

堂軚突然唔係好受控制

擺兩擺之後

就咁派底咗.......

成個人碌咗一個圈

感覺到雙手雙腳都擦損咗

好似火燒咁慶

左腳腳掌特別痛

再望番前面

嗰部的士已經駛走

我再睇唔到佢車牌號碼......

定一定神

好彩後面啲車都見到我炒底咗

冇車收掣不及撞埋嚟

我第一時間熄匙

點知太緊張

擰匙擰過籠

打開咗個油缸蓋

啲電油立刻倒出

搞到成地係油之餘

仲好鬼死跣

閂番油蓋

𢭃番起部車

既然冇發生碰撞

就將部車推去一個可以長擺嘅地方

我忍住痛推住車

沿分域街推去藝術中心側門

上埋行人路再停喺電訊大廈對外行人天橋

泊好車就坐埋一邊打999

等待白車到場期間

我打番電話俾屋企人同女友

白車好快就到

救護員同我檢查傷勢

頭同上半身都冇乜問題

當佢想檢查我隻左腳時

佢問：「先生，可唔可以剪爛你條褲」

我心諗：「剪爛咗我咪冇褲著返屋企？」

我所以就答：「不如我上咗車先除俾你啦。」

咁佢就繼續幫我包紮

呢個時候

交通警亦經已到場

問過我事發經過後

佢就叫我吹波仔

酒精測試結果係.....“0”

搞咗一輪

阿Sir走埋

我就被抬上擔架床送上救護車

上咗車包紮埋雙腳

之後就瞓喺度無所事事咁等.......

救護員問我有冇見暈

使唔使吸下氧氣

我話唔使啦

但佢好堅持

終於佢將會氧氣罩lup住我口鼻

成件事睇落大鑊咗好多咁........

又等咗一輪

終於開車送我去律敦治務急症室

去到ER

又有奇遇

下回分解