網絡上一個互相轉寄的電郵,列出二十樣小時候(應泛指70年代末,80年代初出生的那一輩人)必然做過的幼稚行為,我這個無聊之霸,當然樣樣試過,甚至有點追加難度……
1.玩米缸,將手插入米缸裡面o既米裡面
米好涷,夏天將手插入米中,簡直涼透心,有時還可以找到一兩個芒果
2.在百貨公司入面「篤」扶手電梯的吊牌
一定要好大力咁拍,等個牌大幅度咁Fing前Fing後
3.地下有階磚特登隔一格一格黎行
4.用錶面反射陽光照黎照去
5.跳樓梯(愈多級愈勁)
家住唐樓,大把樓梯可以跳。有一次睇電視劇,見到劇中人從樓梯頂「碌」落樓梯,結果昏迷不治。當時我為咗測試「碌落樓梯係咪會死得人」,我從樓梯頂特登「碌」落去,結果……當然冇事,因為個頭完全冇撞過落地。
6.有路唔行,專行那些高起o左o既地方
而家仲做緊,我除左鍾意行高起o左o既地方之外,更鍾意行落坑渠,享受「低人一等」o既感覺。
7.鋪張紙在硬幣上面然後用鉛筆係上面掃番個形出黎
8.食完瑞士糖之後將糖紙包番好,扮有粒糖
9.超級市場踩住架購物車黎行
而家仲做緊,不過改用機場行李車玩。賽道包括香港國際機場、巴黎戴高樂機場、法蘭克福國際機場及羅馬達文西國際機場,其中以羅馬機場最好玩,因為條斜路夠長夠斜。
10.踩水tum係好特登果隻
有一次嫌玩水tum唔夠過癮,玩埋淋雨,地點係屋企樓下o既街市。兩個傻仔,係落狗屎o既雨勢中走來走出,夠晒白痴。
11.吹口水波
12.搣牆上的乳膠漆或牆紙
我仲試過刻自己個英文全名上公屋o既牆上,搬走之後,下一家人應該會識得我。
13.係o既平滑地面上面跣下跣下
嫌地下唔夠跣,將半樽爽身粉倒落地下,搞到通屋地下都舖o左一層薄薄o既爽身粉,跣到無倫。當母親返屋企見到時,當然打o左鑊甘。
14.整濕d紙巾掟上學校廁所天花頂
地點唔係學校,而家屋企廁所,母親發現之後,當然又打。有一次沖涼,望住沖涼房個烏絲燈膽,心諗:「如果我潑水上去會發生咩事呢?」,跟住我真係向個燈膽不停潑水。結果,個燈膽突然間爆開o左,我要摸黑沖埋個涼。沖完就向家人訛稱個燈膽突然間爆o左,好得人驚。
15.食完綠箭香口膠一定摺返成張包裝紙再放返入個大套入面
16.將沾滿粉筆粉的粉刷放係風扇上面等個風扇轉轉轉得怏個時飛出黎睇下個粉刷中邊個
又或者將個粉刷擲向風扇,實驗整明,粉刷絕對經不起風扇打擊,一打就散晒。
17.拿阿媽d線圈放膠袋(當風爭咁放)
18.拿AA膠痴d手指....再等佢乾....用口咬返d膠出o黎...一塊塊的....
呢樣好似冇做過,因為AA膠太臭,唔會用口咬。
19.用塗改液....係咁o即起一個位...等佢變一個半圓波波...乾左面果層.....再用禁爆佢.....再去廁所洗手..........
我會用指甲壓爆個波,咁就唔駛洗手,用間尺刮就乾淨晒!
20.係咁切擦子膠切完一條條儲埋去....整一條大o既.....
我諗佢係話,不斷擦好多擦膠碎出o黎,之後再將d碎擦番埋一條大擦膠碎。不過我試過有一次,覺得一舊用得耐o既白色擦膠好污糟,所以將表面個層切出o黎,搞到周地都係擦膠碎,阿Sir見到,問我做緊乜,我話整番乾淨舊擦膠。點知阿Sir唔信仲話我講大話狡辯,無啦啦罰我留堂。個次係我我人生之中,唯一一次被人罰留堂,當時我讀緊三年級。
你呢?又玩過幾多樣?